रत्नागिरी (Ratnagiri), 20 मार्च, : जोपर्यंत समाजातील सर्व स्तरावरील महिलांमध्ये महिला कायदेविषयक जागरूकता होणार नाही, तोपर्यंत विविध संरक्षण यंत्रणांना त्यांना सहजरीत्या मदत करणे शक्य होणार नाही. त्यासाठी महिलांनी त्यांच्या हक्कांबद्दल जागरूक राहणे ही काळाची गरज आहे, असे प्रतिपादन चिपळूण जिल्हा न्यायाधीश डॉ. अनिता नेवसे यांनी केले.
चिपळूण तालुका विधी सेवा समिती, वकील संघ आणि चिपळूण पंचायत समिती यांच्या संयुक्त विद्यमाने महिलांमध्ये कायदेविषयक जागरूकता निर्माण करण्यासाठी शिबिराचे आयोजन करण्यात आले होते. त्यावेळी कार्यक्रमाच्या प्रमुख पाहुण्या व अध्यक्ष जिल्हा न्यायाधीश डॉ. नेवसे यांनी उपस्थित अंगणवाडी सेविका व आशा सेविकांना ८ मार्च हा दिवस ‘आंतरराष्ट्रीय महिला दिवस’ म्हणून का साजरा केला जातो, याची ऐतिहासिक पार्श्वभूमी सांगितली. त्या म्हणाल्या की, गेल्या १२० वर्षांपासूनचा कालखंड विचारात घेतल्यास असे दिसून येते की, ८ मार्च या दिवशी जगभरात कोठे ना कोठे महिलांनी क्रांती केलेली आहे, त्यांच्या हक्कांसाठी संघर्ष केला आहे. न्याय्य मागण्यांसाठी लढा दिलेला आहे. महिलांना घटनेने दिलेले अधिकार व महिलांविषयी असलेल्या विविध कायद्यांच्या तरतुदींबाबत त्यांनी महत्त्वपूर्ण मार्गदर्शन केले.
हुंडाप्रतिबंधक कायदा, विविध कायद्यांमधील पोटगीच्या तरतुदी, मुस्लिम स्त्री संरक्षण कायदा, हिंदू वारसा कायदा, हिंदू दत्तक भरण पोषण कायदा, गर्भलिंग निदान प्रतिबंध कायदा, कामाच्या ठिकाणी महिलांचा लैंगिक छळ (प्रतिबंध, मनाई व निवारण) कायदा इत्यादी कायद्यांच्या महत्त्वपूर्ण तरतुदी त्यांनी सोप्या भाषेत समजावून सांगितल्या.
सध्याच्या जीवनशैलीतील बदल, दिवसेंदिवस वाढत चाललेल्या महिलांच्या जटील समस्या व त्या समस्यांचे निराकरण करण्यासाठी अस्तित्वात आलेले प्रगल्भ कायदे, महिलाविषयक विविध योजना, सर्वोच्च व उच्च न्यायालयाच्या विविध न्यायनिवाड्यांमधील महिलांचे संरक्षण आदेश व मार्गदर्शक तत्त्व याबाबतही त्यांनी सखोल माहिती दिली. विविध प्रकारच्या कायद्यांमध्ये सुधारणा करून स्त्रियांना जास्तीत जास्त संरक्षण देण्यासाठी शासन संस्था, न्यायसंस्था व सामाजिक संस्था प्रयत्नशील आहेत, असेही त्या म्हणाल्या.
महिलांवरील अत्याचाराचे स्वरूप म्हणजेच हुंडाबळी, बलात्कार, छेडछाड, विनयभंग, रॅगिंग, लैंगिक छळ, घटस्फोट, द्विभार्या, स्त्रीधनाचे प्रश्न, स्त्रियांच्या संपत्तीचे प्रश्न, कौटुंबिक हिंसाचार अशा सर्व प्रकारच्या महिलांवरील अत्याचारासाठी स्त्री संरक्षण कायदे तिचे खरे मार्गदर्शक आहेत, असे त्यांनी सांगितले.
तालुका विधी सेवा समितीतर्फे ‘कायद्याची ओळख” या पुस्तिकेचे वाटप केले. वकील संघाच्या उपाध्यक्ष ॲड. नयना पवार यांनी बालविवाह प्रतिबंधक कायद्यातील विविधी तरतुदी व अॅसिड हल्ला प्रकरणी शासनाच्या विविध योजना याबाबत मार्गदर्शन केले.
ॲड. मोहिते व संरक्षण अधिकारी श्रीमती जाधव यांनी कौटुंबिक हिंसाचाराचे प्रकार, त्याबाबतचे संरक्षण आदेश व दंडनीय कारवाई याबाबत सखोल माहिती दिली. गटविकास अधिकारी श्रीमती घाडगे यांनी अंगणवाडी सेविकांसाठी असलेल्या योजनांबाबत मार्गदर्शन केले. सहायक गटविकास अधिकारी श्री. कांबळे यांनी कार्यकमाचे उत्कृष्ट सूत्रसंचालन केले. वरिष्ठ लिपीक श्रीमती कासार यांनी आभार मानले.
कार्यकमासाठी अंगणवाडी सेविका, आशा सेविका, पंचायत समितीच्या महिला कर्मचारी मोठ्या संख्येने उपस्थित होत्या.
Related posts:
