Who is Atishi :दिल्लीच्या मुख्यमंत्री म्हणून आतिशी यांची एकमुखाने निवड झाली आहे. अरविंद केजरीवाल यांच्या राजीनाम्यानंतर मुख्यमंत्री कोण होणार? याची चर्चा रंगली होती. यामध्ये आता आतिशी यांचं नाव निश्चित झालं आहे. आतिशी ( Atishi ) यांच्या नावाची घोषणा होताच मोठा जल्लोष झाला. अरविंद केजरीवाल हे आज उपराज्यपालांकडे राजीनामा सुपूर्द करतील. त्यानंतर आतिशी ( Atishi ) या दिल्लीच्या मुख्यमंत्री म्हणून शपथ घेतील.
आतिशी यांचं नाव चर्चेत होतंच
मुख्यमंत्रिपदाच्या शर्यतीत आतिशी ( Atishi ) यांचं नाव सुरुवातीपासूनच आघाडीवर होतं. पक्षातील ज्येष्ठ नेत्यांच्या विश्वासू नेत्या अशी आतिशी मार्लेना यांची ओळख आहे. महिला असणं आणि मंत्री असणं या त्यांच्या जमेच्या बाजू आहेत. केजरीवाल यांच्या मंत्रिमंडळात ज्या महिला मंत्र्यांकडे सर्वाधिक खाती आहेत त्यापैकी आतिशी या एक आहेत. आम आदमी पक्षाच्या स्थापनेनंतर विधानसभा निवडणुकीसाठीचा आपचा जाहीरनामा आतिशी यांनी तयार केला होता.
आतिशी यांच्याकडे कुठली खाती सध्याच्या घडीला आहेत?
महिला व बालविकास, शिक्षण, पर्यटन, कला, संस्कृती व भाषा, सार्वजनिक बांधकाम विभाग आणि वीज या विभागांचा समावेश आहे. महिला मतांची बँक आकर्षित करण्यासाठी आतिशी ( Atishi ) यांच्या नावाचा पक्षाने विचार केला असावा. याशिवाय विरोधकांना महिला मुख्यमंत्र्यावर टीका करणं अडचणीचं ठरणार आहे त्यामुळेही हा निर्णय झाला असावा अशी चर्चा आहे.
आतिशी कोण आहेत?
- आतिशी मार्लेना या दिल्लीच्या कालकाजी मतदारसंघातून आमदार आहेत.
- अरविंद केजरीवाल सरकारमध्ये त्यांच्याकडे सर्वाधिक खात्यांची जबाबदारी आहे.
- माजी उपमुख्यमंत्री मनिष सिसोदिया यांच्या सल्लागार म्हणूनही त्यांनी काम पाहिलं आहे.
- आतिशी दिल्ली सरकारमधील उच्चशिक्षित मंत्र्यांपैकी एक आहेत.
- आतिशी यांनी ऑक्सफर्ड विद्यापीठातून इतिहासाची मास्टर्स पदवी घेतली आहे.
Delhi New CM : ‘या’ होणार दिल्लीच्या नव्या मुख्यमंत्री
२०१९ पासून आतिशी सक्रिय राजकारणात
आतिशी ह्या पंजाबी राजपूत कुटुंबातील आहेत. त्यांचा जन्म दिल्लीत झाला होता. त्यांचे वडील दिल्ली विद्यापीठात प्रोफेसर होते. आतिशी यांनी ऑक्सफोर्ड विद्यापीठातून पदवी शिक्षण घेतले आहे. आतिशी ह्या पहिल्यांदा २०२० मधील विधानसभा निवडणुकीत निवडून आल्या. त्याआधी त्यांनी २०१९ मध्ये त्यांनी लोकसभा निवडणूक लढवली होती. पण भाजपचे उमेदवार गौतम गंभीर यांनी त्यांचा ४.७७ लाख मतांनी पराभव केला होता. त्या लोकसभा निवडणुकीत तिसऱ्या स्थानी राहिल्या होत्या.
आतिशी ह्या केजरीवाल यांच्या विश्वासातील मानल्या जातात. त्या अण्णा हजारेंच्या आंदोलनात संघटनेत सक्रिय राहिल्या होत्या. त्यांच्याकडे सध्या आप सरकारमधील सर्वाधिक खात्यांची जबाबदारी आहे. जेव्हा केजरीवाल तुरुंगात होते; तेव्हा त्यांनी पक्षापासून ते सरकारच्या निर्णयांची जबाबदारी सांभाळली. आतिशी पहिल्यांदा २०२० मध्ये कालकाजी मतदारसंघातून आमदार म्हणून निवडून आल्या. त्यांनी भाजपच्या उमेदवार धर्मवीर सिंह यांचा ११ हजार ३९३ मतांनी पराभव केला होता.
आडनावाविषयी उत्सुकता
आतिशी यांचा जन्म ८ जून १९८१ रोजी झाला. आतिशी यांचे वडील विजय सिंह आणि तृप्ता वाही हे दोघेही प्राध्यापक होते. मार्क्स आणि लेनिन यांच्या विचारांनी प्रभावित असलेल्या त्यांच्या कुटुंबीयांनी त्यांना ‘मार्लेना’ असं नाव दिलं. तेव्हापासून त्या आतिशी मार्लेना म्हणूनच ओळखल्या जाऊ लागल्या. मात्र, सक्रिया राजकारणात उतरल्यानंतर त्यांनी आडनाव न वापरण्याचा निर्णय घेतला. त्यामुळं सध्या त्या आतिशी याच नावानं ओळखल्या जातात.
