गडचिरोलीत दोन नक्षलवाद्यांना कंठस्नान

गडचिरोली, १४ डिसेंबर: गडचिरोलीत पोलिस आणि नक्षलवाद्यांमध्ये आज, गुरुवारी झालेल्या चकमकीत पोलिसांनी २ नक्षलवाद्यांना कंठस्नान घातले आहे. मृतक दहशतवाद्यांमध्ये कसनसूर दलमचा उप कमांडर दुर्गेश वट्टी याचाही समावेश आहे.

गोडलवाही पोलीस स्टेशन पासून १० किलोमीटर अंतरावर छत्तीसगडमधील मोहल्ला मानपूर जिल्ह्यातील बोधीटोला जवळ माओवाद्याची एक मोठी तुकडी तळ ठोकून असल्याची गोपनीय माहिती मिळाली. त्याआधारे गडचिरोली पोलीसांनी शोधमोहीम राबवली. यादरम्यान माओवाद्यांनी पोलिस पथकावर अंदाधुंद गोळीबार केला. त्याला पोलीस दलाने जोरदार प्रत्युत्तर दिले. ही चकमक जवळपास १ तास सुरू होती. त्यानंतर परिसरात शोध घेतला असता एक एके ४७ आणि एक एस एल आर रायफल आणि २ नक्षलवाद्यांचे मृतदेह सापडले. त्यापैकी एकाची प्राथमिक ओळख पटली असून तो कसनसूर दलमचा उप कमांडर दुर्गेश वट्टी असल्याचे सांगितले जात आहे. नक्षलवादी वट्टी हा २०१९ मधील जांभूळखेडा स्फोटाचा मुख्य सूत्रधार होता. ज्यात गडचिरोली पोलिसांचे १५ जवान शहीद झाले होते. पुढील ऑपरेशन आणि परिसराचा शोध सुरू आहे. पोलिसांनी दोन्ही मृतदेह गडचिरोली येथे आणले असुन दुसऱ्या मृतकाची ओळख पटविण्याचे काम सुरू आहे.