नागपूर : मुख्यमंत्री एकनाथ शिंदे यांनी (CM Eknath Shinde at RSS Reshimbag Smriti Bhawan) बुधवारी सकाळी राष्ट्रीय स्वयंसेवक संघाच्या रेशीमबाग येथील स्मृती मंदिर परिसराला भेट देऊन रा. स्व. संघाचे आद्य सरसंघचालक डॉ. हेडगेवार आणि द्वितीय सरसंघचालक गोळवलकर गुरुजी यांच्या स्मृतींना अभिवादन केले. रेशीमबाग येथील हेडगेवार स्मृतीस्थळाच्या दर्शनाने ऊर्जा आणि प्रेरणा मिळते, असे वक्तव्य यावेळी मुख्यमंत्री एकनाथ शिंदे केले. लोकांच्या सेवेची प्रेरणा घेऊन येथून जाणार आहोत, आम्हाला काय मिळाले यापेक्षा आम्ही देशाला काय देणार हा विचार हेडगेवार यांनी दिला आहे, असेही मुख्यमंत्री म्हणाले. मुख्यमंत्र्यांसह शिवसेना आमदार भरत गोगावले आणि अन्य नेते, कार्यकर्ते उपस्थित होते. मुख्यमंत्री झाल्यानंतर एकनाथ शिंदे यांची रेशीमबागेतील डॉ. हेडगेवार स्मृती भवन परिसराला ही दुसरी भेट आहे.
काल भाजप व शिंदे गटातील इतर नेत्यांनी रेशीमबागला भेट दिली होती. आज मुख्यमंत्री व शिंदे गटातील काही नेते रेशीमबागेत आले होते. यावेळी बोलताना मुख्यमंत्री म्हणाले, नागपुरातील हिवाळी अधिवेशनात रेशीमबागमध्ये भेट देऊन हेडगेवार यांच्या स्मृतीस्थळाचे दर्शन घेत असतो. इथे येण्यात हिंदुत्वाच्या मुद्द्यात काही राजकरण आहे असे तुम्हाला वाटते का? आमचे हिंदुत्व विकासाचे आहे. सबको साथ लेकर चलना असे पंतप्रधान देखील सांगतात, असे शिंदे म्हणाले. आमचे सरकार हे सामान्य माणसाचे सरकार आहे. सामान्य माणूस कधी पण मुख्यमंत्र्यांना भेटू शकतो. मी सामान्य माणूस म्हणून काम करतो म्हणून लोक माझ्यावर प्रेम करतात, असे शिंदे म्हणाले. फडणवीस मुख्यमंत्री असताना सुरू केलेल्या योजना मविआ सरकारने बंद केल्या होत्या. त्याआम्ही पुन्हा सुरू केल्या. हा पुरोगामी महाराष्ट्र आहे. सर्व जातीपातीचे लोक एकत्र राहतात. राज्यात कायदा सुव्यवस्था बिघडू नये ही आमची भूमिका आहे. जनतेच्या भावना लक्षात घेऊन आम्ही निर्णय घेऊ, असे मुख्यमंत्री म्हणाले.
