बहार आयोजित पक्षीसप्ताहात लोकजागर
सर्वच पशूपक्ष्यांविषयी कारुण्य बाळगा – न्या. विवेक देशमुख
वर्धा(Wardha) – सर्व संतांनी, विचारवंतांनी आणि समाज सुधारकांनी पशूपक्षी आणि सजीवसृष्टीविषयी कारुण्यभाव जोपासला आहे. पर्यावरणाच्या संरक्षणासाठी कारुण्याची ही भावना प्रत्येकाने जोपासली तरच पर्यावरणाचा ऱ्हास टाळता येईल, असे प्रतिपादन जिल्हा विधी सेवा प्राधिकरणाचे सचिव न्या. विवेक देशमुख यांनी पक्षीसप्ताहाच्या उद्घाटन समारोहात केले.
बहार नेचर फाउंडेशनद्वारे स्थानिक आसमंत स्नेहालय येथे आयोजित या उद्घाटन समारोहाच्या अध्यक्षस्थानी बहारचे अध्यक्ष डाॅ. बाबाजी घेवडे होते. यावेळी समाज कल्याण अधिकारी प्रतिभा भागवतकर, आसमंत स्नेहालयचे संचालक शिवाजी चौधरी, वृक्षमित्र मुरलीधर बेलखोडे, मानद वन्यजीव रक्षक तथा बहारचे उपाध्यक्ष संजय इंगळे तिगावकर, वनपरिक्षेत्र अधिकारी वैशाली भलावी यांची प्रमुख उपस्थिती होती.
पर्यावरणाला हानी पोहचविणार विकास आम्हाला नको आहे, अशी भावना अध्यक्षीय भाषणात डाॅ. बाबाजी घेवडे यांनी व्यक्त केली. यावेळी उपस्थित अतिथींनीही समयोचित मार्गदर्शन केले. कार्यक्रमाचे प्रास्ताविक संजय इंगळे तिगावकर यांनी केले. संचालन डाॅ. आरती प्रांजळे घुसे ह्यांनी केले व आभार बहारचे सचिव जयंत सबाने यांनी मानले.
उद्घाटन समारोहाला बहारचे संस्थापक अध्यक्ष प्रा. किशोर वानखडे, उपाध्यक्ष दीपक गुढेकर, कोषाध्यक्ष राजदीप राठोड, सहसचिव देवर्षी बोबडे, अतुल शर्मा, अॅड. पवन दरणे, घनश्याम माहोरे, पर्यावरणप्रेमी गुणवंत डकरे, बाबाराव भोयर, आकाश जयस्वाल, सेवानिवृत्त वनपाल अशोक भानसे, नरेंद्र पहाडे, याकुब शेख, सुनील ढाले, प्रकाश कांबळे, राकेश काळे, अॅड. मनेशकुमार सज्जन, निवास उरकुडे, महेश भस्मे, पल्लवी बोदिले, सुरज बोदिले, भारती गोमासे, प्रतीक्षा गेटमे, संघर्ष डहाके यांच्यासह वन विभागाचे कर्मचारी, बहारचे सदस्य, सेवाश्रमातील विद्यार्थी व ज्येष्ठ नागरिकांची उपस्थिती होती.
*पक्षीनिरीक्षण, चित्रप्रदर्शन व वृक्षारोपणाने आरंभ*
या सप्ताहाची सुरुवात पक्षीनिरीक्षण व कचरा निर्मूलन उपक्रमाने करण्यात आली. यात पक्षिमित्र, निसर्गप्रेमी व सेल अकॅडमीचे विद्यार्थी मोठ्या संख्येने सहभागी झाले होते. कार्यक्रमस्थळी विद्यार्थ्यांसाठी पक्षीवैभव चित्रप्रदर्शन लावण्यात आले होते. तसेच, बुद्धटेकडी मित्र परिवाराच्या सहकार्याने टेकडीवर अतिथींच्या हस्ते वृक्षारोपण करण्यात आले.
या संपूर्ण सप्ताहात बोर व्याघ्र प्रकल्प, रोठा तलाव, दिग्रस तलाव, सालोड येथील पक्षीअधिवास, पवनार येथील धाम नदी परिसर आदी विविध ठिकाणी पक्षीनिरीक्षण करण्यात येणार आहे. तर, सातेफळ येथील आश्रमशाळा, राहाटी व सुसुंद येथील उच्च प्राथमिक शाळा, म.गां. हिंदी आंतरराष्ट्रीय विद्यापीठाचे केंद्रीय विद्यालय येथे पक्षीचित्र प्रदर्शनी व पर्यावरण जागृती उपक्रमाचे आयोजन करण्यात येणार आहे. पक्षीसप्ताहाचा समारोप दि. १२ रोजी महात्मा गांधी आयुर्वेद महाविद्यालयाच्या वनौषधी उद्यानात करण्यात येईल. नागरिकांनी, विद्यार्थ्यांनी आपल्या परिसरात आढळणाऱ्या पक्ष्यांची नोंद घ्यावी, असे आवाहन बहार नेचर फाउंडेशनद्वारे करण्यात आले आहे.
