टीसीला प्रवाशांची मारहाण, नेमकी कश्यासाठी?

मुंबई लोकलमध्ये टीसीवर प्रवाशांची हाणामारी

मुंबई (Mumbai), १८ ऑगस्ट : मुंबईतील चर्चगेट-विरार जलद वातानुकूलित (एसी) लोकल ट्रेनमध्ये (Churchgate-Virar fast air-conditioned (AC) local train in Mumbai)तिकीट तपासणीदरम्यान झालेल्या मारहाण प्रकरणाने खळबळ उडवली आहे. नुकत्याच झालेल्या या घटनेत मुख्य तिकीट निरीक्षक (टीसी) जसबीर सिंग यांनी तिकीट तपासत असताना तीन प्रवासी प्रथम श्रेणीचे तिकीट नसतानाही एसी लोकलने प्रवास करत असल्याचे आढळले. त्यांनी प्रवाशांना रेल्वेच्या नियमानुसार दंड भरण्यास सांगितले, त्यावरून प्रवासी अनिकेत भोसले यांच्यासोबत वाद झाला.

वादाचे रुपांतर हाणामारीत झाले, त्यात जसबीर सिंग किरकोळ जखमी झाले. प्रवाशांनी त्यांचा शर्ट फाडल्याचे आणि मारहाण केल्याचे व्हिडीओतून उघड झाले. विशेष म्हणजे, जसबीर सिंग यांनी इतर प्रवाशांकडून जमा केलेले १५०० रुपयेही या गोंधळात गहाळ झाले.

या घटनेचा व्हिडीओ डब्यातील एका प्रवाशाने रेकॉर्ड केला, ज्यामुळे हा प्रकार प्रकाशझोतात आला. नंतर रेल्वे सुरक्षा बलाचे (आरपीएफ) अधिकारी घटनास्थळी दाखल झाले आणि भोसले यांना नालासोपारा स्थानकावर उतरवण्यात आले. पुढील चौकशीत आरोपींनी आपली चूक मान्य केली आणि सिंग यांना त्यांच्या गहाळ झालेल्या रकमेची परतफेड केली.

जसबीर सिंग यांनी मोठ्या मनाने आरोपींवर गुन्हा दाखल न करता त्यांना सक्त ताकीद देऊन सोडले. हा प्रसंग प्रवाशांच्या वर्तणुकीबाबत आणि सार्वजनिक शिस्तीच्या गरजेवर गंभीर प्रश्न उपस्थित करतो. तिकीट तपासणीसारखी प्रक्रिया सुखकरपणे पार पाडण्यासाठी प्रवाशांनी संयम बाळगावा आणि नियमांचे पालन करावे, असा संदेश या घटनेतून मिळतो.