स्‍वामी गोविंददेव गिरी महाराज व डॉ. चंद्रप्रकाश द्विवेदी यांची विशेष उपस्थिती
वैविध्‍यपूर्ण कार्यक्रमांची नागपूरकरांना मिळणार मेजवानी
नागपूर (Nagpur) : केंद्रीय मंत्री मा. ना. श्री. नितीन गडकरी यांच्या संकल्पनेतून 2017 साली खासदार सांस्कृतिक महोत्सवाला प्रारंभ झाला होता. यंदाचे हे महोत्‍सवाचे दहावे पर्व आहे. वर्षागणिक त्‍याचे स्‍वरूप अधिक भव्‍य होत आहे. मागील वर्षी दोन कोटी लोकांनी प्रत्‍यक्ष व सोशल माध्‍यमांवर महोत्‍सवातील विविध कार्यक्रमांचा आस्‍वाद घेत उच्‍चांक गाठला. दोन विक्रमांची नोंद करणारा हा महोत्सव देशातला सर्वात मोठा सांस्कृतिक महोत्सव म्‍हणून गणला जाऊ लागला आहे.
यावर्षी, खासदार सांस्कृतिक महोत्सव – 2025 चे आयोजन येत्‍या, 7 ते 18 नोव्‍हेंबर दरम्‍यान हनुमाननगरातील क्रीडा चौक येथील ईश्वर देशमुख शारीरिक शिक्षण महाविद्यालयाच्या पटांगणावर करण्‍यात येणार आहे. सकाळ व संध्‍याकाळ अशा दोन सत्रात होणा-या या महोत्‍सवात धार्मिक व सांस्कृतिक कार्यक्रमांची भरगच्‍च मेजवानी नागपूरकरांना मिळणार असून राष्‍ट्रीय-आंतरराष्‍ट्रीय ख्‍यातीच्‍या कलाकारांसोबतच स्‍थानिक कलाकारदेखील या मंचावर आपली कला सादर करतील, पत्रकार परिषदेत केंद्रीय मंत्री मा. श्री. नितीन गडकरी यांनी यासंदर्भात शुक्रवारी घोषणा केली.
मंचावर पालकमंत्री चंद्रशेखर बावनकुळे, कृष्‍णाजी खोपडे, प्रवीण दटके, अॅड. सुलेखाताई कुंभारे, डॉ. भूषणकुमार उपाध्‍याय, डॉ. उपेंद्र कोठेकर, दयाशंकर तिवारी, यांच्‍यासह खासदार सांस्कृतिक महोत्सव समितीचे अध्‍यक्ष प्रा. अनिल सोले व इतर पदाधिकारी उपस्थित होते.
उद्घाटनाचा भव्‍य सोहळा
सलग बारा दिवसांचे भव्‍य आयोजन असलेल्‍या यंदाच्‍या खासदार सांस्कृतिक महोत्‍सवाचे उद्घाटन 7 नोव्‍हेंबर रोजी सायंकाळी 6.30 वाजता आध्‍यात्मिक गुरू व श्रीराम जन्‍मभूमी तीर्थक्षेत्र ट्रस्‍टचे कोषाध्यक्ष प.पू. स्‍वामी गोविंददेव गिरी जी महाराज यांच्या हस्‍ते होणार आहे. ‘चाणक्‍य’, ‘सम्राट पृथ्‍वीराज’ यासारख्‍या कलाकृतींच्‍या माध्‍यमातून भारतीय संस्‍कृती, इतिहास आणि परंपरांना घरोघर पोहोचवणारे लेखक व दिग्‍दर्शक पद्म श्री डॉ. चंद्रप्रकाश द्विवेदी यांचीदेखील उपस्थिती राहील. उद्घाटन कार्यक्रमानंतर प्रसिद्ध अभिनेते आशुतोष राणा यांची प्रमुख भूमिका असलेलं नाटक ‘हमारे राम’ याची प्रस्‍तुती होणार आहे. प्रभू श्रीराम यांच्या जीवनावर आधारित या नाटकामध्‍ये आशुतोष राणा यांनी रावणाची भूमिका साकारली आहे.
सहा लाईव्‍ह इन कॉन्‍सर्ट्स
खासदार सांस्कृतिक महोत्‍सवात 8 नोव्‍हेंबर रोजी गायक व संगीतकार विशाल मिश्रा यांची लाईव्‍ह इन कॉन्‍सर्ट होणार आहे. त्‍यानंतर 12 तारखेला युवा गायक अखिल सचदेवा यांची लाईव्‍ह इन कॉन्‍सर्ट, 14 तारखेला संगीतकार विशाल भारद्वाज व गायिका रेखा भारद्वाज तर 16 तारखेला श्रेया घोषाल यांची लाईव्‍ह इन कॉन्‍सर्ट होईल.
17 तारखेला लोकप्रिय गायक व संगीतकार शंकर महादेवन यांची लाईव्‍ह इन कॉन्‍सर्ट होणार आहे. कोट्यवधी स्वयंसेवकांसाठी प्रेरक असलेली आणि त्याच्या मनात राष्ट्रभक्तीचे स्फुल्लिंग चेतवणारी काही निवडक संघ गीते श्री. शंकर महादेवन यांनी नव्याने संगीतबद्ध केली असून ते यावेळी या संघगीतांसोबतच काही देशभक्‍तीपर गीते सादर करतील. समारोपाच्‍या दिवशी 18 तारखेला प्रसिद्ध मराठी संगीतकार जोडी अजय-अतुल यांची लाईव्‍ह इन कॉन्‍सर्ट होईल.
फ्यूजन, हास्यजत्रा आणि कविसंमेलन
9 तारखेला होणा-या ‘फ्यूजन’ या विविध वाद्यांचा संगम असलेल्‍या कार्यक्रमात आंतरराष्‍ट्रीय ख्‍यातीचे बासरी वादक रोणू मजुमदार, संस्‍कार भारतीचे अखिल भारतीय अध्‍यक्ष व प्रसिद्ध व्‍हायोलिन वादक मंजुनाथ महादेवप्‍पा, प्रसिद्ध तालवादक तौफिक कुरेशी यांच्‍यासह बिक्रम घोष, सितार व संतूरवादक ‘स्‍वीकार’ सुनील कट्टी, मनीष कुळकर्णी, अतुल रनिंगा व श्रीदर पार्थसारथी यांचा सहभाग राहणार आहे. 11 तारखेला ‘महाराष्ट्राची हास्यजत्रा’ हा अत्यंत लोकप्रिय मराठी विनोदी कार्यक्रम आयोजित करण्‍यात आला असून यात प्राजक्ता माळी, सई ताम्हणकर, प्रसाद ओक, समीर चौगुले, नम्रता संभेराव, गौरव मोरे इत्‍यादी कलाकारांचा सहभाग राहणार आहे. 15 रोजी अखिल भारतीय हिंदी कविसंमेलन होणार असून त्‍यात हरिओम पंवार, दिनेश बावरा, सुदीप भोला अंकिता सिंह, तेजनारायण शर्मा व अमन अक्षर हे कवी सहभागी होतील.
संत परंपरेचा जागर
वंदनीय राष्‍ट्रसंत तुकडोजी महाराजांच्‍या जीवनावर आधारित 2000 कलाकारांचा सहभाग असलेला ‘राष्‍ट्रसंतांची जीवनगाथा’ हा दृक श्राव्‍य स्‍वरूपाचा संगीतमय कार्यक्रम 10 तारखेला होणार असून 15 तारखेला बालकला अकादमी निर्मित संत ज्ञानेश्‍वरांचा 750 वा जयंती उत्सवानिमित्‍ताने ‘ज्ञानियांचा राजा’ हा कार्यक्रम सादर केला जाणार आहे. यात नागपुरातील 400 हून अधिक बालकलाकारांचा यात सहभाग राहील. संस्‍कार भारतीचा ‘मिट्टी के रंग : भारत की लोकसंस्‍कृती की संगीत नृत्‍यमय गाथा’ हा कार्यक्रम 13 नोव्‍हेंबर रोजी सादर होईल.
गीता पठणासह भक्‍तीचा जागर
मागील वर्षी प्रमाणे यंदाही खासदार सांस्कृतिक महोत्‍सवात 8 ते 17 नोव्‍हेंबर या कालावधीत दररोज सकाळी 7 ते 8.30 वाजेदरम्‍यान ‘जागर भक्‍तीचा’ या उपक्रम आयोजित करण्‍यात आला आहे. या उपक्रमाची सुरुवात गीता पठणाने होणार असून यात ५वी ते १२वी इयत्तेतील ५०,००० हून अधिक विद्यार्थी एकाच ठिकाणी एकत्र येऊन भगवद्गीतेचा १२वा, १५वा आणि १६वा अध्याय सामूहिकरित्या पठण करतील. हा उपक्रम विद्यार्थ्यांच्या एकाग्रता, शिस्त, आत्मविश्वास आणि मूल्याधारित शिक्षण यांना प्रोत्साहन देणारा ठरणार आहे. यावेळी नितीन गडकरी यांच्या हस्‍ते गीता पठण कार्यक्रमाचा लोगोचे अनावरण करण्‍यात आले.
याशिवाय, श्रीराम रक्षा व मारुती स्‍तोत्र पठण, शिवमहिम्‍न पठण, श्री गणपती अथर्वशीर्ष स्‍तोत्र पठण, श्री हरिपाठ पठण, श्री गजानन विजय ग्रंथ 21 वा अध्याय पठण, श्री विष्‍णू सहस्‍त्रनाम पठण, हनुमान चालिका व सुंदरकांड पठण, परित्‍तदेशना (महा परित्राण पाठ) आणि श्री पुरूष सुक्‍त श्री सुक्‍त पठण यांचा समावेश राहणार आहे.
क्‍युआर कोड स्‍कॅन करा पासेस मिळवा
कोणत्‍याही अडथळ्याविना या महोत्‍सवाचा आनंद घेण्‍यासाठी क्‍युआर कोडद्वारे मोफत पासेस उपलब्‍ध करून देण्‍यात येणार आहे. जाहिराती, होर्डिंग्‍ज इत्‍यादी प्रसिद्धी साधनांवर असलेला क्‍युआर कोड स्‍कॅन केल्‍याबरोबर www.khasdarmahotsav.com हे संकेतस्‍थळ सुरू होईल व तेथून त्‍या-त्‍या दिवसाची मोफत पास प्राप्‍त करता येतील. नागपूर-विदर्भाची व मध्‍य भारताची शान असलेल्‍या या खासदार सांस्कृतिक महोत्सवाला नागपूरकरांनी भरभरून प्रतिसाद द्यावा, असे आवाहन खासदार सांस्कृतिक महोत्सव आयोजन समितीचे अध्‍यक्ष प्रा. अनिल सोले, उपाध्यक्ष डॉ. गौरीशंकर पाराशर, अशोक मानकर, दिलीप जाधव, सचिव जयप्रकाश गुप्‍ता, कोषाध्यक्ष प्रा. राजेश बागडी, सदस्य बाळासाहेब कुलकर्णी, हाजी अब्‍दुल कदीर, सारंग गडकरी, अविनाश घुशे, डॉ. दीपक खिरवडकर, संदीप गवई, संजय गुळकरी, रेणुका देशकर,गुड्डू त्रिवेदी, किशोर पाटील, चेतन कायरकर, आशिष वांदिले, भोलानाथ सहारे, अॅड. नितीन तेलगोटे, मनिषा काशीकर, विजय फडणवीस, महेंद्र राऊत, दिलीप गौर, शैलेश ढोबळे यांनी केले आहे.
खासदार सांस्कृतिक महोत्सव 2025
वेळापत्रक
| क्र. | तारीख | दिवस | कलाकार |
| 1 | 07-11-2025 | शुक्रवार | उद्घाटन – प.पू. गोविंद गिरी महाराज व पद्म श्री डॉ. चंद्रप्रकाश द्विवेदी यांची उपस्थिती.
अभिनेते आशुतोष राणा यांचे ‘हमारे राम’ नाटक |
| 2 | 08-11-2025 | शनिवार | विशाल मिश्रा – लाईव्‍ह इन कॉन्‍सर्ट |
| 3 | 09-11-2025 | रविवार | फ्यूजन |
| 4 | 10-11-2025 | सोमवार | वंदनीय राष्‍ट्रसंत तुकडोजी महाराजांवरील ‘राष्‍ट्रसंतांची जीवनगाथा’ हा दृक श्राव्‍य संगीतमय कार्यक्रम |
| 5 | 11-11-2025 | मंगळवार | महाराष्ट्राची हास्य जत्रा |
| 6 | 12-11-2025 | बुधवार | अखिल सचदेवा – लाईव्‍ह इन कॉन्‍सर्ट |
| 7 | 13-11-2025 | गुरुवार | संस्कारभारती ‘मिट्टी के रंग’ हा कार्यक्रम |
| 8 | 14-11-2025 | शुक्रवार | रेखा भारद्वाज व विशाल भारद्वाज – लाईव्‍ह इन कॉन्‍सर्ट |
| 9 | 15-11-2025 | शनिवार | कविसंमेलन |
| 10 | 16-11-2025 | रविवार | श्रेया घोषाल – लाईव्‍ह इन कॉन्‍सर्ट |
| 11 | 17-11-2025 | सोमवार | शंकर महादेवन – संघगीत |
| 12 | 18-11-2025 | मंगळवार | अजय-अतुल – लाईव्‍ह इन कॉन्‍सर्ट |
‘जागर भक्‍तीचा’ कार्यक्रम वेळापत्रक
सकाळी 7 ते 8.30
| क्र. | तारीख | दिवस | कार्यक्रम |
| 1 | 08-11-2025 | शनिवार | श्रीमद् भगवत् गीता पठण |
| 2 | 09-11-2025 | रविवार | श्रीराम रक्षा व मारुती स्‍तोत्र पठण |
| 3 | 10-11-2025 | सोमवार | शिव महिमा स्‍तोत्र पठण |
| 4 | 11-11-2025 | मंगळवार | श्री गणपती अथर्वशीर्ष स्‍तोत्र पठण |
| 5 | 12-11-2025 | बुधवार | श्री हरिपाठ पठण |
| 6 | 13-11-2025 | गुरुवार | श्री गजानन विजय ग्रंथ 21 वा अध्याय पठण |
| 7 | 14-11-2025 | शुक्रवार | श्री विष्‍णू सहस्‍त्रनाम पठण |
| 8 | 15-11-2025 | शनिवार | हनुमान चालिका व सुंदरकांड पठण |
| 9 | 16-11-2025 | रविवार | परित्‍तदेशना (महा परित्राण पाठ) |
| 10 | 17-11-2025 | सोमवार | श्री सुक्‍त पठण |
स्‍थानिक कार्यक्रमांचे वेळापत्रक
सायंकाळी 6 ते 7 वाजेदरम्‍यान
| क्रमांक | तारीख | दिवस | कार्यकम |
| 1 | 09-11-2025 | Wednesday | सुरमाला |
| 2 | 10-11-2025 | Thursday | Finger Artist |
| 3 | 12-11-2025 | Friday | बासरी वादन |
| 4 | 13-11-2025 | Saturday | बाल कला अकादमी |
| 5 | 14-11-2025 | Sunday | Transgender Show |
| 6 | 15-11-2025 | Monday | बाल कला अकादमी |
| 7 | 16-11-2025 | Tuesday | नुपूर अकादमी |
| 8 | 17-11-2025 | Wednesday | किल्ले महोत्सव बक्षिस वितरण |
