(Mumbai)मुंबई : शिवसेना आमदारांच्या अपात्रता याचिकेवरील सुनावणीचे वेळापत्रक अखेर जाहीर करण्यात आले आहे. (Shivsena Mla Disqualification) यासंदर्भातील युक्तिवाद १३ ऑक्टोबर ते २३ नोव्हेंबरदरम्यान २३ नोव्हेंबरनंतर दोन आठवड्यात अंतिम सुनावणी होणार आहे. नवरात्रीच्या काळात कागदपत्रांवर सुनावणी तर दिवाळीनंतर उलटतपासणी होणार असल्याची माहिती सूत्रांनी दिलीय.
विधानसभेच्या अध्यक्षांकडून शिवसेना शिंदे गट आणि ठाकरे गटाला सुनावणीचे पुढील वेळापत्रक ईमेल द्वारे पाठवण्यात आले आहे. २५ सप्टेंबरला झालेल्या सुनावणीत ठाकरे गटाच्या वतीने सर्व याचिकांवर एकत्रित सुनावणी घ्या, अशी मागणी करण्यात आली. तर या सर्वांना स्वतंत्र पुरावा द्यायचा असल्याने त्याची वेगवेगळी सुनावणी घ्यावी, अशी मागणी शिंदे गटाच्या वतीने करण्यात आली होती. या सर्व गोष्टींचा विचार १३ तारखेला सर्व याचिका एकत्र करायच्या की नाही, यावर सुनावणी होणार आहे. १३ ते २० ऑक्टोबर दरम्यान दोन्हीही गटांनी एकमेकांना दिलेली कागदपत्रांची विधिमंडळाकडून तपासणी होणार आहे. २० ऑक्टोबर रोजी सर्व याचिका एकत्रित करायच्या की नाही, यावर निकाल दिला दिला जाणार आहे.
२० ऑक्टोबरला काही अधिकची कागदपत्रे एखाद्या गटाला सादर करायची असतील तर त्यासाठी संधी दिली जाणार आहे. २७ ऑक्टोबरला दोन्हीही गट आपापले म्हणणे ( स्टेटमेंट) सादर करतील. ६ नोव्हेंबरपर्यंत दोन्ही गट आपली बाजू मुद्देसूद मांडतील. त्यानंतर दावे आणि प्रतिदावे करतील. १० नोव्हेंबरला दोन्ही गटांनी मांडलेल्या मुद्द्यांच्या अनुषंगाने सुनावणी पार पडणार आहे. २० नोव्हेंबरला दोन्ही गटांच्या साक्षीदारांची यादी सादर केली जाणार असून २३ नोव्हेंबरला साक्षीदारांची उलट साक्ष घेतली जाणार आहे. सर्व पुरावे तपासल्यानंतर पुढील दोन आठवड्यात अंतिम सुनावणी पार पडणार आहे.
