मुंबई : अभियांत्रिकी आणि औषधनिर्माणशास्त्र पदवी अभ्यासक्रमांच्या प्रवेशासाठी राज्य समाईक प्रवेश परीक्षा कक्षाद्वारे घेण्यात आलेल्या एमएचटी-सीईटी परीक्षेचा निकाल 12 जूनला जाहीर होणार आहे. हा निकाल ऑनलाईन पद्धतीने सकाळी 11 वाजता जाहीर होणार आहे. निकाल जाहीर झाल्यानंतर केंद्रीय पद्धतीने प्रवेश फेऱ्या सुरु होतील. त्यासाठी कॅप राउंड संदर्भातील वेळापत्रक जाहीर होणार आहे.
एमएचटी सीईटी परीक्षा 9 ते 21 मे या कालावधीत घेण्यात आली होती. फिजिक्स, केमिस्ट्री, मॅथ्स ग्रुपची (पीसीएम) परीक्षा 9 ते 13 मे दरम्यान तर फिजिक्स, केमिस्ट्री, बायोलॉजी ग्रुपची (पीसीबी) परीक्षा 15 ते 20 मे या कालावधीत पार पाडण्यात आली होती. केंद्रीभूत प्रवेश प्रक्रिया पूर्ण झाल्यानंतर प्रवेश नियामक प्राधिकरणाकडून देण्यात येणारे मान्यतेबाबत संस्था, महाविद्यालये तसेच विद्यार्थीच्या लॉगीन आयडीमध्ये कळविण्यात येणार आहेत.
