मुंबई (Mumbai), १४ सप्टेंबर (Mahavikas Aghadi)महाविकास आघाडीच्या आगामी विधानसभा निवडणुकीसाठी जागावाटपाचा फॉर्म्युला जवळपास निश्चित झाल्याची माहिती समोर आली आहे. गणेशोत्सवानंतर आता महाविकास आघाडीच्या बैठकीत या फॉर्म्युलावर अंतिम ठराव होईल.
सध्याच्या चर्चा आणि मागण्यांनुसार, काँग्रेसने १०० ते १०५ जागांची मागणी केली आहे, शिवसेना ठाकरे गटाने ९५ ते १०० जागा मागितल्या आहेत, तर शरद पवार गटाने ८५ ते ९० जागांची मागणी केली आहे. या फॉर्म्युलाच्या आधारे, काँग्रेस, ठाकरे गट आणि पवार गट यांचे स्वतःचे आराखडे निश्चित करण्यात आले आहेत.
मुख्यमंत्रिपदावरून काँग्रेस आणि ठाकरे गटात रस्सीखेच सुरू आहे, आणि या बैठकीत मुख्यमंत्रिपदाबद्दलही अंतिम निर्णय घेतला जाईल, असे बोलले जात आहे. पवार गटाने लोकसभेच्या फॉर्म्युला कायम ठेवण्याचे ठरवले असून, त्यांचा लक्ष नवीन चेहऱ्यांना संधी देण्यावर असेल. ठाकरे गटाला साधारणतः ३० ते ३५ जागा मिळण्याची शक्यता आहे, असे काही सर्व्हेतून समोर आले आहे.
या सर्व चर्चांसाठी गणेशोत्सवाच्या उरलेल्या काळात अनेक महत्त्वाच्या बैठका होतील, आणि नवरात्रीपूर्वी किंवा दरम्यान अंतिम निर्णय जाहीर केला जाईल, अशी शक्यता वर्तविण्यात येत आहे.
