नागपूर (Nagpur)-हल्ली लिव्ह इनमध्ये राहण्याचे प्रमाण वाढत असतानाच काही दिवसांनी त्यांच्यात उडणारे खटकेही चर्चेत आहेत. अशीच एक घटना काही दिवसांपूर्वी जरीपटका पोलीस स्टेशनच्या हद्दीत घडली. सुरुवातीला आत्महत्येचा हा प्रकार असल्याचे दिसत असताना हा ‘ लिव्ह इन’ मधून हत्येचा प्रकार असल्याचे उघड झाले, पोलिसांनी या विवाहित इसमाविरोधात गुन्हा दाखल करीत त्याला अटक केली. गंगाधर अर्जुन घरडे (४८, रा. नागार्जुन कॉलनी, जरीपटका) असे अटकेतील आरोपीचे नाव असून नीतू (वय ३४) असे मृतक महिलेचे नाव आहे. चारित्र्याच्या संशयातून लिव्ह इनमध्ये राहणाऱ्या प्रेयसीची हत्या करून मृतदेह सीताफळाच्या झाडाला लडकवल्याची ही खळबळजनक घटना असून या विवाहित प्रियकराने सदर तरुणीची हत्या करून पोलिसांची दिशाभूल करण्यासाठी ही घटना आत्महत्या भासवण्याचा प्रयत्न केल्याचे तपासात उघड झाले.मात्र शवविच्छेदन अहवालात ही आत्महत्या नसून हत्या असल्याचे समोर आले आणि पोलिसांनी फास आवळला.
जरीपटका परिसरात २ मार्च रोजी एक महिला झाडाला गळफास लावलेल्या अवस्थेत आढळली. मात्र पोस्ट मार्टममध्ये या प्रियकराचे पितळ उघडं पडले व महिलेची गळा आवळून हत्या आणि मृत्यूपूर्वी मारहाण झाल्याचे पीएम रिपोर्ट्सतून समोर आलं. पोलिसांनी गंगाधरला ताब्यात घेतल्यानंतर चौकशीत त्याने गुन्हा कबूल केला.गंगाधर हा पेंटिंगचे काम करतो.नीतुचे आधी लग्न झाले असून तिला पहिल्या पतीपासून दोन मुली होत्या. २०१७ पासून ती पतीपासून वेगळी व घरकाम करून उदरनिर्वाह चालवत होती. २०१९ मध्ये तिने गंगाधरशी लग्न करत असल्याचे कुटुंबीयांना सांगत ती लिव्ह इनमध्ये त्यांच्यासोबत राहू लागली. मात्र,काही दिवसानंतर नीतूने कुटुंबीयांना सांगितले की, गंगाधर आधीपासूनच विवाहित असून त्याला दोन मुलीही आहेत. तो दररोज दारूच्या नशेत तिच्या चारित्र्यावर संशय घेऊन मारहाण करीत असल्याची माहिती दिलयाचेही कुटुंबीयांनी सांगितले. १ मार्चच्या रात्री गंगाधरने त्याची प्रेयसी नीतूचा गळा आवळून हत्या केली. रात्रीच्या अंधारातच तिचा मृतदेह घरासमोरील सीताफळाच्या झाडाला लटकवला. त्यानंतर दुसऱ्या दिवशी पोलिसात नीतूने आत्महत्या केल्याची माहिती दिली.
