१४४३ मूर्तींचे कृत्रिम कुंडात विसर्जन
चंद्रपूर (Chandrapur) – चंद्रपूर महानगरपालिकेतर्फे शहरात मूर्ती विसर्जनाच्या सोयीच्या दृष्टीने सुरु करण्यात आलेल्या ३ फिरत्या विसर्जन रथाचे आज अतिरिक्त आयुक्त चंदन पाटील यांच्या हस्ते फीत कापुन उदघाटन करण्यात आले.याप्रसंगी उपायुक्त मंगेश खवले,मुख्य लेख परीक्षक मनोज गोस्वामी,रवींद्र कळंबे,चैतन्य चोरे व मनपा अधिकारी कर्मचारी उपस्थीत होते.
उत्‍सवादरम्‍यान होणारी गर्दी टाळण्‍याकरिता महापालिका प्रशासनातर्फे घरगुती गणेश मूर्तींच्या विसर्जनासाठी झोननिहाय ‘फिरत्या विसर्जन कुंडांची’ व्यवस्था करण्यात आली आहे. या फिरत्या विसर्जन कुंडांसाठी झोननिहाय संपर्क क्रमांक महापालिकेद्वारे उपलब्ध करून देण्यात आलेले आहेत. मनपातर्फे पुरविण्यात आलेल्या या घरपोच सुविधेमुळे अत्यंत शांतीपूर्ण व भक्तिमय वातावरणात भाविक आपल्या लाडक्या बाप्पाला निरोप देत आहेत.
त्याचप्रमाणे दीड दिवसाच्या गणपतीचीही स्थापना करण्यात येत असल्याने स्थापनेच्या दुसऱ्याच दिवशी विसर्जनाच्या व्यवस्थेची गरज भासते. दीड दिवसाच्या गणेश मूर्तींचे विसर्जन करण्याच्या दृष्टीनं मनपाद्वारे उभारण्यात आलेल्या २५ कृत्रिम तलावात रविवार ८ सप्टेंबरपर्यंत १४४३ गणेश मूर्तींचे विसर्जन करण्यात आले आहे. यात एकही पीओपी (POP) मुर्ती आढळुन आली नाही.
मागील वर्षी पीओपीच्या मुर्तींचा वापर न करून नागरिकांनी प्रशासनास सहकार्य केले होते यंदाही श्रीगणेशोत्सवाच्या सुनियोजित आयोजनासाठी चंद्रपूर मनपा दक्ष असून भाविकांनीही पर्यावरणपुरक श्रीगणेशोत्सव संपन्न व्हावा याकरीता सहकार्य करण्याचे तसेच सर्व घरगुती व लहान मूर्तींचे विसर्जन कृत्रिम कुंडातच करण्याचे आवाहन चंद्रपूर महानगरपालिकेतर्फे करण्यात येत आहे.
आपल्या परिसरातील विसर्जन रथाची माहिती घेण्याकरिता पुढील क्रमांकांवर संपर्क साधता येईल.
● झोन १ – 98815 90402
● झोन २- 90759 25310
● झोन ३ – 86004 94028
