मुंबईः महाविकास आघाडीचे सरकार असताना मला अटक करण्याचा प्रयत्न सुरू होता, असा आरोप उपमुख्यमंत्री देवेंद्र फडणवीस यांनी केला होता. आता मुख्यमंत्री एकनाथ शिंदे यांनीही यावर भाष्य केले असून गिरीश महाजन आणि देवेंद्र फडणवीस यांच्या अटकेच्या चर्चा सुरू असतानाचा या चर्चांचा मी साक्षीदार आहे, असा गौप्यस्फोट त्यांनी (CM Eknath Shinde) केलाय. काल विधिमंडळाच्या अर्थसंकल्पीय अधिवेशनाच्या पूर्वसंध्येला बोलताना मुख्यमंत्री शिंदे यांनी ही माहिती दिली. गिरीश महाजन आणि देवेंद्र फडणवीस या दोघांना आता घाला, या वक्तव्याचा मी साक्षीदार असून त्यावेळी मी काय म्हणालो होतो हे मी योग्य वेळी सांगेन. पण, हे सर्व उद्योग कोण करत होते हे सर्व मला माहिती असल्याचे मुख्यमंत्री एकनाथ शिंदे यांनी नमूद केले.
मुख्यमंत्री म्हणाले की, आमच्यावर विरोधकांना धमकवल्याचा आरोप केला जातो. मात्र, ठाकरे सरकारने रवी राणा-नवनीत राणा यांना अटक केली होती. केंद्रीय मंत्री नारायण राणे यांना जेवणाच्या ताटावरून उचलून नेले व अटक केली. कंगना रनौतचे घर पाडण्यात आले. एवढी तत्परता ठाकरे सरकारने दाखवली. गिरीश महाजन यांच्यावर मोक्का लावण्याची तयारी होती. त्याची कॅसेटही बाहेर आली, याकडे त्यांनी लक्ष वेधले.
दरम्यान, आम्ही चहापानाला गेलो असतो तर तो महाराष्ट्रद्रोह झाला असता, अशी टिका करणाऱ्या ठाकरे गटावर मुख्यमंत्र्यांनी शरसंधान साधले. दाऊदची बहिण हसीना पारकरला ज्यांनी चेक दिला, त्यांच्या मंत्र्यांनी राष्ट्रद्रोह केला, तरीही त्यांचा राजीनामा अजित पवार यांनी घेतला नाही. खरे सांगायचे तर अजित पवारांसोबत चहा पिण्याच्या प्रसंग टळला. कारण महाराष्ट्रद्रोह मोठा की देशद्रोह मोठा? सत्तेच्या बाहेर पडल्यामुळे अजित पवार वैफल्यग्रस्त झाले आहेत. त्यांनी मानसिकता आम्ही समजू शकतो. मासा पाण्याविना तडफडतो, तशी सत्तेच्या बाहेर गेल्यानंतर विरोधकांची अवस्था झाली आहे, याकडे शिंदेनी लक्ष वेधले.
