नागपूर (Nagpur) 02 जुलै :- विद्यार्थ्यांना आणि शिक्षकांना कार्यक्षमतेने आणि प्रभावीपणे ज्ञान आणि कौशल्ये आत्मसात करण्यात मदत करण्यासाठी विशिष्ट उद्देश लक्षात घेऊन शैक्षणिक साहित्य, अभ्यासक्रम आणि कार्यक्रम तयार करण्याची पद्धत म्हणजे निर्देशात्मक रचना करणे होय. या संदर्भात, शासकीय तंत्रनिकेतन नागपूरचे प्राध्यापक, डॉ. जी. के. आवारी, ऑटोमोबाईल अभियांत्रिकी विभागाचे प्रमुख, यांनी केलेल्या भरीव योगदानाबद्दल इंडियन सोसायटी फॉर टेक्निकल एज्युकेशन, ISTE, नवी दिल्ली यांनी नुकताच राष्ट्रीय पुरस्कार देऊन गौरव केला आहे.
अलीकडेच ISTE नवी दिल्ली द्वारा दिल्या जाणारा उत्तरप्रदेश शासनाचा राष्ट्रीय पुरस्कार डॉ. आवारी यांना 22 जून 2024 रोजी भुवनेश्वर येथे आयोजित ISTE च्या 53 व्या वार्षिक अधिवेशनात अभियांत्रिकी आणि तंत्रज्ञानाच्या विशिष्ट क्षेत्रात केलेल्या उत्कृष्ट कार्यासाठी सरकारी राष्ट्रीय पुरस्कार-2023 प्रदान करण्यात आला. डॉ. आवारी यांनी प्रयोगशाळा मॅन्युअलसह, शैक्षणिक तंत्रज्ञान आणि पुस्तक लेखनात केलेल्या उल्लेखनीय कार्याचा गौरव म्हणून हा पुरस्कार प्रदान करण्यात आला. त्यांनी अभियांत्रिकी आणि तंत्रज्ञान क्षेत्रात 10 पुस्तके लिहिली आहेत आणि त्यापैकी 5 पुस्तके त्यांच्या सह-लेखकांसह प्रसिद्ध आंतरराष्ट्रीय प्रकाशकासाठी म्हणजे CRC प्रेस, टेलर आणि फ्रान्सिस ग्रुप लंडनसाठी लिहिली आहेत. डॉ. आवारी यांची पुस्तके जगभरात आणि विशेषत: यूएस आणि यूके विद्यापीठांमध्ये ओळखली जातात. ISTE, नवी दिल्लीचे अध्यक्ष डॉ. प्रतापसिंह देसाई, कलिंगा (KIIT) आणि KISS विद्यापीठ, भुवनेश्वर, ओरिसा यांचे संस्थापक अध्यक्ष श्री अच्युता सामंत आणि KIIT आणि KISS विद्यापीठे, भुवनेश्वरचे कुलगुरू यांच्या प्रमुख उपस्थितीत हा पुरस्कार प्रदान करण्यात आला.
डॉ. समीर तेलंग, ऑटोमोबाईल अभियांत्रिकीमधील वरिष्ठ प्राध्यापक यांनी पुस्तकांचे गुण आणि आशिया खंडातील विद्यार्थ्यांच्या समुदायाला होणारे फायदे विशद केले आहेत. डॉ. एम. बी. डायगव्हाणे, प्राचार्य, शासकीय तंत्रनिकेतन, नागपूर, यांनी डॉ. जी. के. आवारी यांच्या शैक्षणिक तंत्रज्ञानाच्या विकासासाठी केलेल्या प्रयत्नांचे अभिनंदन व कौतुक केले.
