मुंबई MUMBAI : राजस्थान विधानसभा निवडणूक प्रचारासाठी गेलेल्या एकनाथ शिंदे यांचा उल्लेख तेथे लावण्यात आलेल्या बॅनरवर हिंदूहृदयसम्राट असा करण्यात आल्याने टिकाटिप्पणी सुरु झाली आहे. ठाकरे गटाने खरमरीत टीका केली आहे. या बॅनरचा फोटो सोशल मीडियावर व्हायरल झाल्यानंतर ठाकरे गट आक्रमक झाला आहे. ठाकरे गटाचे नेते आदित्य ठाकरे आणि संजय राऊत यांनी जोरदार टीका केली आहे. (CM Eknath Shinde)
मुख्यमंत्री एकनाथ शिंदे यांच्या हिंदुहृदयसम्राट उल्लेखावर आदित्य ठाकरे यांनी म्हटले की,बाप चोर, पक्ष चोर, आता हिंदुहृदयसम्राट पदवीही चोरली. किती निर्लज्जपणा? त्याचा कळस गाठलाय, किती मास्क लावून फिरणार? किती दिखावा करणार, यापेक्षा एखादी चांगली एक्टिंग करा. ३१ डिसेंबरनंतर हे सरकार जाणार म्हणजे जाणार अशा शब्दात आदित्य ठाकरे यांनी मुख्यमंत्री शिंदेंवर घणाघात केला आहे. खासदार संजय राऊतांनी शिंदेंवर निशाणा साधलाय. सत्तेसाठी बेईमानी करणा-यांना हिंदूहृदयसम्राट म्हणण्याची नवी परंपरा नव्या हिंदुत्वात सुरु झाली असावी. बाळासाहेबांनी सत्तेसाठी बेईमानी केलेली नाही. एकनाथ शिंदे हे हिंदुहृदयसम्राट असतील तर त्यांनी हिंदुहृदयसम्राट म्हणून काय असं महान कार्य केलंय…? हे त्यांनीच सांगावं. बाळासाहेबांचं कार्य आम्ही पाहिलं आहे, असेही ते म्हणाले.
