Nagpur : मध्य नागपूर विधानसभा मतदारसंघात मतदानादरम्यान मोठा गोंधळ उडाल्याची घटना समोर आली आहे. निवडणूक अधिकाऱ्यांना मारहाण करून ईव्हीएम आणि व्हीव्हीपीएटी मशीन लुटण्याचा प्रयत्न करण्यात आला. या प्रकरणात काँग्रेसचे उमेदवार बंटी शेळके यांच्या समर्थकांवर गंभीर आरोप झाले असून, भाजप आणि काँग्रेस कार्यकर्त्यांमध्ये हाणामारीही झाली.मतदान पूर्ण झाल्यानंतर बूथ क्रमांक २६८ मधील निवडणूक अधिकारी ईव्हीएम आणि व्हीव्हीपीएटी मशीन घेऊन स्ट्राँग रूमकडे जात होते. दरम्यान, अज्ञात तरुणांनी त्यांच्यावर तलवारी आणि चाकूने हल्ला केला. या हल्ल्यात वाहन चालकाच्या हाताला गंभीर दुखापत झाली आहे.
निवडणूक अधिकाऱ्यांवर अज्ञातांकडून हल्ला
घटनेनंतर काँग्रेसचे उमेदवार बंटी शेळके समर्थकांसह घटनास्थळी दाखल झाले. यावेळी गोंधळ वाढल्याने काही वाहनांची तोडफोड करण्यात आली. त्याचवेळी भाजपचे उमेदवार प्रवीण दटके देखील समर्थकांसह घटनास्थळी पोहोचले, ज्यामुळे भाजप आणि काँग्रेस कार्यकर्त्यांमध्ये बाचाबाची व मारहाण झाली.
घटनेची माहिती मिळताच पोलीस तत्काळ घटनास्थळी पोहोचले. त्यांनी ईव्हीएम मशीन, व्हीव्हीपीएटी आणि सरकारी कर्मचाऱ्यांना सुरक्षितपणे बाहेर काढले. जखमी वाहनचालकाला उपचारासाठी रुग्णालयात दाखल करण्यात आले आहे.पोलीसांनी गोंधळ घालणाऱ्यांविरोधात गुन्हा दाखल करून तपास सुरू केला आहे. या हल्ल्यातील वाहन आणि इतर साहित्य कोतवाली पोलीस ठाण्यात नेण्यात आले.
या घटनेनंतर कोतवाली पोलीस ठाण्याबाहेर भाजप व काँग्रेस कार्यकर्त्यांचा मोठा जमाव जमला होता. वरिष्ठ पोलीस अधिकाऱ्यांनी हस्तक्षेप करत दोन्ही गटांना हटवले. सध्या पोलीस याप्रकरणाचा तपास करत असून दोषींविरुद्ध कठोर कारवाईचे संकेत दिले आहेत.
या घटनेमुळे मध्य नागपूरचे राजकीय वातावरण अधिक तापले आहे. निवडणुकीच्या पार्श्वभूमीवर अशी घटना घडल्याने निवडणूक आयोगानेही या प्रकरणाची दखल घेतली असून अधिक तपासाचे आदेश दिले आहेत.
