मुख्यमंत्र्यांच्या निवासस्थानी घडली घटना
नवी दिल्ली(New Delhi), 13 मे आम आदमी पार्टीच्या (आप) राज्यसभा खासदार स्वाती मालीवाल यांना आज, सोमवारी मुख्यमंत्री अरविंद केजरीवाल(Arvind Kejriwal) यांच्या निवासस्थानी मारहाण झाल्याची घटना घडली. केजरीवाल यांचे स्वीय सहाय्यक विभव कुमार यांनी मारहाण केल्याचा आरोप खासदार मालिवाल यांनी केला असून याप्रकरणी सिव्हील लाईन्स पोलिसात तक्रार दाखल केलीय.
याबाबत एका पोलीस अधिकाऱ्याने सांगितले की, मालीवाल यांनी सकाळी 10 वाजता पोलिस नियंत्रण कक्षाला फोन करून मुख्यमंत्र्यांच्या निवासस्थानी मारहाण झाल्याचे सांगितले. त्यानंतर सिविल लाइन्स पोलीस ठाण्याचे एक पथक मुख्यमंत्र्यांच्या निवासस्थानी पोहोचले दरम्यान दिल्ली पोलीस, स्वाती मालिवाल, आम आदमी पार्टी तसेच मुख्यमंत्री अरविंद केजरीवाल यांच्याकडून कोणतेही निवेदन आलेले नाही. मात्र भाजपच्या काही नेत्यांनी सोशल मीडियावर अरविंद केजरीवाल यांच्याविरोधात टीकाटिप्पणी सुरू केली आहे. भाजप नेते अमिल मालवीय यांनी ट्विटरवर लिहिले की, आम आदमी पार्टीच्या राज्यसभा खासदार आणि दिल्ली महिला आयोगाच्या माजी अध्यक्षा स्वाती मालिवाल यांनी आरोप केला आहे की, दिल्लीचे मुख्यमंत्री केजरीवाल यांच्या पीए ने त्यांच्यावर हल्ला केला. दिल्ली मुख्यमंत्री निवासस्थानातून फोन केला गेला. केजरीवाल यांच्या अटकेनंतर स्वाती मालिवाल यांनी कोणतीच प्रतिक्रिया दिली नव्हती. त्यावेळी ती भारतात नव्हत्या व खूप दिवसांनी देशात परतल्या होत्या.
स्वाती मालिवाल आम आदमी पार्टीच्या तडफदार नेत्या आहेत. याचवर्षी पक्षाने त्यांना राज्यसभेवर पाठवले आहे. यापूर्वी त्या दिल्ली महिला आयोगाच्या अध्यक्षा होत्या व महिलांवर होण्याच्या अत्याचाराविरोधात सक्रीय राहून काम केले होते. स्वाती आम आदमी पार्टीच्या संस्थापक सदस्यांपैकी एक आहेत. जंतर मंतरवरील अण्णा हजारेंच्या आंदोलनावेळी त्या केजरीवाल यांच्या सोबत होत्या.
