नवी दिल्ली (New Delhi) 24 जुलै :- केंद्र सरकार शेतकऱ्यांच्या मागण्या मान्य करण्यात अपयशी ठरले आहे. त्यामुळे शेतकरी दिल्ली मोर्चा कायम ठेवणार असल्याची घोषणा शेतकरी नेत्यांनी केली. लोकसभेतील विरोधी पक्षनेते राहुल गांधी यांनी 12 शेतकरी नेत्यांनी भेट घेतली. त्यानंतर ही घोषणा करण्यात आली.
किमान आधारभूत किंमत (एमएसपी) सुधारण्यासाठी सरकारवर दबाव आणणाऱ्या शेतकऱ्यांनी बुधवारी सकाळी संसदेच्या संकुलात काँग्रेस खासदार राहुल गांधी यांची भेट घेतली. पंजाब, हरियाणा, उत्तर प्रदेश, तेलंगणा, तामिळनाडू आणि कर्नाटकातील 12 शेतकरी नेत्यांनी राहुल यांची भेट घेतली. या भेटीनंतर शेतकरी नेते जगजित सिंग डल्लेवाल यांनी सांगितले की, सरकार आतापर्यंत आश्वासनांची पूर्तता करण्यात अपयशी ठरले आहे. स्वामिनाथन आयोगाची अंमलबजावणी आवश्यक आहे. आमचा दिल्लीकडे मोर्चा सुरूच राहणार आहे. तत्पूर्वी संसद भवनातील राहुल गांधी यांच्या कार्यालयात शेतकऱ्यांची बैठक झाली. त्यात काँग्रेस संघटन सरचिटणीस केसी वेणुगोपाल, पंजाबचे माजी मुख्यमंत्री चरणजित सिंग चन्नी, पंजाब प्रदेश काँग्रेस कमिटीचे अध्यक्ष अमरिंदर सिंग राजा वाडिंग, काँग्रेस नेते सुखजिंदर सिंग रंधावा, गुरजित सिंग औजला, धरमवीर गांधी, अमर सिंग, दीपेंद्र सिंग हुडा आणि जय प्रकाश यांचाही समावेश होता. बैठकीनंतर अमरिंदर सिंग राजा वाडिंग म्हणाले की, राहुल गांधी संसदेत शेतकऱ्यांचा आवाज उठवणार आहे. शेतकऱ्यांना दिल्लीत येऊन आंदोलन करण्याचा पूर्ण अधिकार आहे. सरकारच्या विरोधात जर खाजगी विधेयक आणण्याची गरज असेल तर आम्ही ते देखील आणू असे त्यांनी सांगितले.
यासंदर्भात राहुल गांधी (Rahul Gandhi) म्हणाले की, शेतकरी नेत्यांना संसद भवनात भेटायला बोलावले होते. पण, त्यांना आत येऊ दिले नाही, म्हणून मी त्यांना भेटायला बाहेर गेलो. शेतकरी नेत्यांच्या भेटीदरम्यान मी सांगितले की काँग्रेसने आपल्या जाहीरनाम्यात एमएसपीची कायदेशीर हमी देण्याबाबत बोलले आहे. याबाबत आम्ही शेतकरी नेत्यांची बैठक घेतली. आम्ही ठरवले आहे की, इंडी आघाडीच्या नेत्यांशी चर्चा करून एमएसपीच्या कायदेशीर हमीसाठी सरकारवर दबाव आणू. या संदर्भात आम्ही विरोधी पक्षांच्या नेत्यांसह सरकारवर दबाव आणण्याचा निर्णय घेतल्याचे राहुल यांनी सांगितले. राहुल गांधी यांची भेट घेतलेल्या शेतकरी नेत्यांमध्ये पंजाबचे जगजित सिंग, श्रवण सिंग पंधार, सुरजित सिंग आणि रमणदीप सिंग मान, हरियाणाचे लखविंदर सिंग, तेजवीर सिंग, अमरजित सिंग आणि अभिमन्यू, कर्नाटकचे शांता कुमार, तेलंगणाचे एन व्यंकटेश्वर राम, पी. तामिळनाडू येथील रामलिंगम यांचा समावेश होता.
