

कल्याण- आपल्या मुलीला आणि मुलाला भेटण्यासाठी गेलेले वडील आणि आजीला बेदम मारहाण केल्याची घटना डोंबिवलीत घडली आहे. धक्कादायक म्हणजे या मुलांच्या आईच्या माहेरच्या मंडळींनी वयोवृद्ध आजीला बेदम मारहाण केली आहे. याप्रकरणी टिळक नगर पोलिसांनी गुन्हा दाखल करत पुढील कारवाई सुरू केली आहे. डोंबिवली पूर्वेतील खंबाळपाडा येथील भोईरवाडी परिसरात राहणाऱ्या अजय कुशवाहा यांचे पत्नीसोबत वाद सुरू आहेत. पत्नी आपली मुलगी आणि मुलासोबत आपल्या आई-वडिलांसोबत राहते. पती-पत्नी मध्ये वाद सुरू असल्याने घटस्फोट प्रक्रिया सुरू आहे. दोन दिवसांपूर्वी अजय आपल्या मुली आणि मुलाला भेटण्यासाठी आपल्या सासरी गेले होते. त्या ठिकाणी आधी त्यांना आपल्या मुली आणि मुलाला भेटू दिले नाही. नंतर त्याच्या मेहूण्याने आपला काही मित्रांना बोलावून त्या ठिकाणी अजयला बेदम मारहाण केली. मग मध्यस्थी करायला गेलेल्या अजयच्या आईला देखील मारहाण करण्यात आली आहे. या प्रकरणात डोंबिवलीतील टिळक नगर पोलिसांनी अमानुषपणे मारहाण करणाऱ्या गणेश सिंग ,अरविंद सिंग ,नयना देवी यांच्या विरोधात गुन्हा दाखल केला आहे. या प्रकरणात टिळक नगर पोलिसांनी पुढील तपास सुरू केला आहे. या मारहाणीत गंभीर जखमी असलेली अजयची आई पार्वती देवी यांच्यावर डोंबिवलीतील शास्त्रीनगर रुग्णालयात उपचार सुरू आहेत.